आँबुखैरेनी र देउराली गाविसको गाउँ परिषद् सम्पन्न

तनहुँको आँबुखैरेनी गाविस र गोरखाको देउराली गाविसको गाउँ परिषद् सम्पन्न भएको छ । आँबुखैरेनी गाविसका अध्यक्ष तथा गाविस सचिव बुद्धिप्रसाद भुषालले आर्थिक वर्ष ०७०÷०७१ को अनुमानित बजेट पेश गरेका थिए । जस अनुसार आय व्यय दुवै तर्फ १ करोड ६२ लाख ६५ हजार ४ सय रुपैयाँ विवरण सार्वजनिक गरेका थिए । परिषद्ले सो आवमा ग्रामीण विद्युतिकरणमा १५ लाख, ग्रामीण सडकमा १२ लाख, खानेपानीमा ५ लाख, शिक्षामा ३ लाख रुपैयाँ विनियोजन गरेको छ ।
यसैगरी स्वास्थ्यमा ४ लाख, भवनमा २ लाख ५० हजार, पैदल मार्गमा १ लाख ५० हजार, तटबन्धनमा २ लाख ५० हजार, र कृषि लगायत विविध कार्यक्रममा १६ लाख ७९ हजार रुपैयाँ विनियोजन गरिएको छ । यसैगरी आदिबासी, जनजाती, अपाङ, दलित पिछडावर्ग, युवा, जेष्ठ नागरिकका ३ लाख ७९ हजार, महिला वर्ग उत्थान कार्यक्रममा २ लाख ५३ हजार, बालबालिका कार्यक्रममा २ लाख ५३ हजार र कृषि कार्यक्रममा ३ लाख ७९ हजार रुपैयाँ विनियोजन गरिएको छ । परिषद्ले आवमा ०६८÷६९ को यथार्थ आय व्यय र ०६९÷०७० को संसोधित अनुमानको आय व्यय सार्वजनिक गरियो ।
रोयल्टी रकम समेत नीतिगत रुपमा जिविसबाट दिइने निर्णय भएकोले आँबुखैरेनीको बजेट बढेको हो । यस्तै स्थानीय स्वायत्त शासन ऐन र नियमावली अनुसार विभिन्न कर असुली गर्ने नीति बनाएको छ ।
सातौं गाउँ परिषद्का प्रमुख अतिथी जिविस तनहुँका निमित्त स्थानिय विकास अधिकारी सरोज तिमिल्सिनाले परिषद्को बजेट विनियोजन र आय श्रोत बढाउने उपायहरु नगरपालिका र जिविसले पनि अनुकरण गर्नुपर्ने बताए । उद्योग वाणिज्य संघ आँबुखैरेनीको सभाहलमा भएको कार्यक्रममा प्रेमबहादुर गुरुङ, शालिग्राम अधिकारी, उपेन्द्र देवकोटा, भीष्मकान्त गौली, वीरबहादुर विक, ऋषी केसी, ऋषी केसी, मीना अधिकारी, कृष्णकुमार श्रेष्ठ, केशरबहादुर केसी लगायतले शुभकामना मन्तव्य दिएका थिए । सचिव भुषालको अध्यक्षतामा भएको कार्यक्रमको उद्घोषण ज्ञानेन्द्र श्रेष्ठले गरेका थिए ।