गोरखाको दरौदीमा बस पल्टियो

गोरखा, आश्विन ९ – नारायणघाटबाट गोरखाको भालुस्वारा गाविस जाँदै गरेको एक यात्रुबाहक बस सोमबार दरौदी नदिमा पल्टिएको छ ।
बसमा सवार करिब ६० यात्रुको सकुशल उद्धार गरिएको प्रहरीले जनाएको छ । प्रहरी नायब उपरीक्षक बहादुरजंग मल्लका अनुसार ना ३ ख ७२९३ नम्बरको यात्रुबाहक बस पानीको वहावले पल्टाएको हो ।बस पल्टन नपाउँदै सबै यात्रु झरिसकेका थिए । यात्रु झरेपछि खाली बस खोलाले पल्टाएको हो । यात्रुको सामान भने सबै बगाएको उपरीक्षक मल्लले बताए । नदिबाट प्रहरी र स्थानियबासी मिलेर बस निकाल्ने काम भइरहेको छ । पुल नभएका कारण वर्षायाममा सवारी साधन सञ्चालन नगरिएको उक्त नदिमा सोमबार मध्यान्ह पहिलोपटक यात्रुबाहक बस हालिएको थियो ।नदिको पानी नघटेका कारण बस पल्टिएको प्रहरीले जनायो । नदिमा तीन बर्षदेखि पक्की पुल बन्ने काम भइरहेको छ ।